मुंबई: महाराष्ट्र नवनिर्माण सेनेचे ज्येष्ठ नेते आणि माजी प्रवक्ते प्रकाश महाजन (Prakash Mahajan) यांनी उपमुख्यमंत्री एकनाथ शिंदे यांच्या नेतृत्वाखालील शिवसेनेत अधिकृत प्रवेश केला आहे. मनसेमधून बाहेर पडल्यानंतर त्यांच्या पुढील राजकीय वाटचालीबाबत राज्यातील राजकीय वर्तुळात मोठी उत्सुकता होती.
नागपूर येथील हिवाळी अधिवेशनादरम्यान त्यांनी मुख्यमंत्री देवेंद्र फडणवीस यांची भेट घेतल्यामुळे ते भाजपमध्ये जाणार असल्याच्या चर्चांना वेग आला होता. मात्र, अखेर या सर्व चर्चांना पूर्णविराम देत त्यांनी शिंदे शिवसेनेत प्रवेश केला आहे.
प्रकाश महाजन (Prakash Mahajan) हे राज ठाकरे यांचे अत्यंत निकटवर्तीय आणि विश्वासू सहकारी म्हणून ओळखले जात होते. मनसेच्या स्थापनेपासूनच ते पक्षात सक्रिय होते आणि अधिकृत प्रवक्ते म्हणून त्यांनी महत्त्वाची जबाबदारी सांभाळली होती.
मात्र, गेल्या काही काळापासून पक्षातील अंतर्गत मतभेद, निर्णयप्रक्रियेबाबतची नाराजी आणि कार्यपद्धतीवरील असहमतीमुळे ते अस्वस्थ होते. अखेर १३ सप्टेंबर रोजी त्यांनी मनसेला रामराम ठोकला होता. त्यांच्या राजीनाम्यामुळे मनसेला मोठा धक्का बसल्याचे राजकीय वर्तुळात बोलले जात होते.
Prakash Mahajan: शिवसेना पक्षप्रवेश मोठ्या गाजावाजाशिवाय
मनसेतून बाहेर पडल्यानंतर प्रकाश महाजन (Prakash Mahajan) नेमकी कोणती राजकीय भूमिका घेणार, याकडे सर्वांचे लक्ष लागले होते. बुधवारी (२५ डिसेंबर) त्यांनी उपमुख्यमंत्री एकनाथ शिंदे यांची भेट घेतली आणि शिवसेनेत प्रवेश करण्याची इच्छा व्यक्त केली.
त्यानंतर अवघ्या एका दिवसात त्यांचा शिंदे गटात अधिकृत प्रवेश पार पडला. विशेष म्हणजे, हा प्रवेश कोणत्याही मोठ्या कार्यक्रमाविना आणि गाजावाजाशिवाय शांतपणे झाला.
महानगरपालिका निवडणुका जवळ आल्या असताना झालेल्या या प्रवेशामुळे राजकीय समीकरणांवर परिणाम होण्याची शक्यता वर्तवली जात आहे. उद्धव ठाकरे आणि राज ठाकरे यांच्यातील युतीची घोषणा झाल्यानंतरही भाजप आणि शिंदे शिवसेनेत नेते व कार्यकर्त्यांचे प्रवेश सुरूच आहेत. प्रकाश महाजन यांचा प्रवेश महायुतीसाठी महत्त्वाचा मानला जात आहे.
मनसेतून बाहेर पडताना प्रकाश महाजन (Prakash Mahajan) यांनी आपली भूमिका स्पष्ट केली होती. वय वाढत असताना पक्षातील काही गोष्टी मनासारख्या नसल्याने राजीनामा दिल्याचे त्यांनी सांगितले होते. कोणावरही वैयक्तिक राग नसल्याचे त्यांनी स्पष्ट केले होते.
तसेच, आपण राष्ट्रीय स्वयंसेवक संघाशी (RSS) संबंधित असल्याचे कधीही लपवले नसल्याचेही त्यांनी नमूद केले होते. “संघाच्या बाबतीत राज ठाकरे यांना घाबरत नाही,” असे त्यांनी ठामपणे सांगितले होते. आता शिंदे शिवसेनेत प्रवेशानंतर राज्याच्या राजकारणात नव्या घडामोडींना सुरुवात झाली आहे.
हेही वाचाः PMC Election 2026: शिवसेना-राष्ट्रवादी एकत्र येणार? पुण्यातील राजकीय समीकरणे बदलण्याची शक्यता
